Hokkaido 北海道

TRAVEL PERIOD : 29 Dec 2015 – 5 Jan 2016

Destination : 札幌、小樽、二世古

alliance traveller : 四眼仔

三條麻甩去滑雪

每年都會去滑雪，但去過好多個雪場始終最愛都係二世古，因為....太多原因，稍後再講！

今次呢個跨年行程係12月29號出發，由於飛機到達札幌已經17:35，入到市區都夜喇，同埋

想添置小小滑雪裝備，所以先住兩晚札幌！

黎得北海道想唔肥都幾難，第一晚嘅晚餐去左"牛禪＂食火鍋放題，呢間牛禪係日本全國都有分店，而且我自己都食過好多次，由於近年尾好多鋪頭/食店都會早收，所以見到有位就即刻衝左入去，三條麻甩食左人12盆牛肉，一人隊左幾杯我至愛日本生啤"YEBISU"，埋單唔洗16000YEN，非常滿足咁走人!

出發前忙到癲左，所以黎到日本先㩒錢，個人認為其實去旅行最方嘅換錢方法就係當地㩒機 !!! 滙率接當日牌價(通常唔會貴得過一般找換店)另加手續費，今次手續費只需110yen

重點係我又無一百幾十萬換，滙率差小小其實損失又有幾多吖 **香港戶口需先開海外提款通功能，同埋所屬銀行會另收手續費，HSBC收HK$20次，下面係我兩次提款記錄 2015年12月30日 ATM CUP(29DEC15)JPY50,110(HKD20FEE)3,266.93 2015年12月30日 ATM CUP(30DEC15)JPY80,110(HKD20FEE)5,202.33

日本人對於每年1月1日，就好似中國嘅農曆新年咁，年廿幾開始會辨下年貨，準備迎接新年，但札幌同東京大阪好唔同，街上非常之熱鬧29/30兩晚條街都非常多人，人來人往...我地住嘅酒店係薄野區，呢度有好多好多夜店，眼見全街酒吧/Table Dance Bar都係坐無虛席，原來15年嘅12月29日係日本最後一個工作天，所以大家收工後都出黎蒲下! 薄野呢度大部份嘅酒吧會聘用年輕女仔再加上性感打扮作招來(唔洗亂諗)，全部都係好正經嘅酒吧黎!

況且你想去唔正經嘅地方一D都唔容易，除非你識日文啦，因為日本怕溝通唔到引致招呼不週甚至引起誤會，所以大多數夜場都唔招呼外國人，點解我知? 官方答案~朋友講嘅 !

第二日成12點先起身，行程就只係去左間好大好大嘅專賣運動用品店買滑雪裝備，相信大家都無興趣睇，如果想知地址就再問我啦

買完野5點幾有D餓，三條麻甩首先去"元祖橫丁拉麵街"隊碗拉麵先之後再去"炭炭"食燒肉，"炭炭"係正我地酒店樓下，收3000yen入場費，標榜食物售價均為來貨價，價錢平到你唔相，而且食物好有水準，白色碟嗰碟呢件11600yen，問你死未 !

我地三條麻甩好食得，食完燒肉行左陣激安又肚餓，又食壽司，飽到訓唔到呀!

注意:日本好多人鍾意食煙，好多餐廳都仲可以食煙

第三日本來諗住8點開車直飛二世古，唔知邊條麻甩話不如中途停一停小樽去三角市場食蟹吖，又食!食蟹喎，你睇下.....

小樽三角市場其實係一個好細形街市，售賣海鮮為主，由於鄰近小樽JR站及可以現場即食新鮮海，大受遊客歡迎 !隨三角市場外，小樽倉庫街亦都相繼開左好多類似嘅商店吸引食客

好，1點鐘終於入到二世古，好好彩可以即刻攞房，今次已經係數唔清第幾次黎，但就每次都要揀間有廚房嘅"家"先得，因為係日本超市/街市自己買野打邊爐係一件極度開心嘅事呀!

今次呢間apartment距離滑雪場Gondola只有兩三百呎，行上都得呀，不過我地咁懶都係揸車去雪場吧啦 !!

Go Go GO滑雪喇喂!(下面呢六張相攝於2015年2月的二世古，因為今次天色好差，D相無咁靚仔)

二世古

係呢滑雪區嘅統稱，呢度距離札幌只有100公里左右，搭巴士都係兩個領鐘頭，非常方便

二世古

共有四個滑雪場，其實係同一山脈，如果搭吊車上到山頂你可以去到任何一個滑雪場，呢四個滑雪場分別係Annupuri、Niseko Village、Hirafu同埋HANAZONO，每個滑雪場都有高、中、低級雪道再加上二世古經常都有Powder Snow(粉雪)，跌都唔痛呀!!

四個滑雪場都設有酒店，餐廳，等等設施，方便到不得了呀!

點解咁愛二世古?

滑滑下雪可以去浸溫泉，浸浸下溫泉可以去食餐好野，食食下野又走返去滑雪

我地住左係滑雪場5晚，由於我太懶同埋食物太吸引，好多都無影相，係咁咿睇住先啦

呢餐蟹宴...還可以啦，哈哈

由於每年都有大量海外遊客，造就滑雪教練呢個職位，出發前book個教練教你幾個鍾，好快就可以型住咁滑落黎，唔想洗錢請教練一樣得，我自己就從未跟過教練喇，不過有班好好嘅朋友，佢地同我講:得架喇，跟住上黎山頂，慢慢玩，好快就可以型住咁滑落黎...(大家要知道滑雪場嘅吊車係只可上，唔會比你搭落)，仲有一句佢地經常講:朋友嘅鼓勵好重要，你得既...就係咁我好多年前就跌到識左滑雪喇!

Hirafu係我最鍾意住嘅地區，因為呢度有最多餐廳、酒吧、便利店...仲有，二世古地區有成廿個溫泉，試諗下每日訓醒就係早餐、滑雪、午餐、滑雪、打邊爐、溫泉...正到呢 !但係要買野打邊爐就要開車出去最近二世古嘅市區 "俱知安" 嗰度有幾間大型超市，我地有一晚本來只係諗住去買碌自拍神掍，結果唔覺意變左買晒野返去打邊爐...(其實仲要係食完飯先去超市)

1. 毛蟹做湯底，試完返唔到轉頭

2. 冰凍啤酒 Yebisu

3. 三人前份量(同一晚第二餐晚飯)

出發前仲諗住今年除夕只係三條麻甩打住邊爐過，但原來Hirafu今年係連續第四十年舉行Torchlight Sking活動，玩法就係用大約30人係山上手持兩碌火把砌出 15 數字，倒數後變成 16字樣，再加上大約二百人手持火把拉龍滑落山，非常非常壯觀，山腳仲有好多好多人觀賞呢條火龍，好似迎接呢條火龍咁！

今年好幸運可以成為其中一個Fire snowboarder，同來自日本、美加、澳洲、英國、德國、法國、瑞士、比利時、中國、台灣、泰國嘅朋友一齊滑住過新年，落山後仲有煙火表演，堅好玩，堅開心呀 !

左上.右上. 由主辨人講解活動過程，注意安全，活動完結後仲有獎抽，大獎係三晚酒店呀！

　　　　　　大獎由一位日本女士抽中，但佢即時轉贈給另一對日本男女，因為佢地將會

　　　　　　結婚呀，當時場面都相當感人下

中右就係個保齡球樽同隻貓結婚

左下　　　　點火喇，準備落山

右下 Ski火把手砌出16字樣